eira de reghos
tenzas, confurcos, outeiros
fontes e máis fontes
Poza da moa
costeiro da pena
zancas, corghas, corredoiras
reghos e máis reghos
Eira de rouco
coto de brocos
penedos, pardiñas, devesas
montes e máis montes
Curro da revolta
ghranxo da pedreira
eucalitos, carballos, salgheiros
piñeiros e máis piñeiros
Corredoira de filgheira
costeiro da aghra
hortas, prados, labradíos
u-las vacas, u-los fillos?
©Caridade Sanz
Qercus robur
saúdo a unha árbore sentenciada ... e unha cita explicativa
(Un so carballo pode alberga 50.000 eirugas; unha sóa folla máis de 500 pulgóns ...máis de 200 especies de insectos aliméntanse dun carballo ...)
Rubiute o cempés
a eiruga, un cento de formigas
mil escaravellos, e tamén
o Manuel e o Xosé de cas do Portugués
Fogar do merliño
da curuxa, do resiñor e do pombo
do cuco e do ferreiriño
¡cantos pitos acubillaches no teu colo!
Patio de lecer do gato
da bolboreta, do verderolo e do pardal
Atalaia sempre certa do miñato
Randeeira do xílgaro e o paporroibo
Décheslle aos veciños:
lume, cama, asento e sombra
Alimento aos xabarís e aos esquíos
Vida e paz a todos
Saberás perdoar o desleixo do ser humano?
(... O homo sapiens é actualmente un poderoso axente "xeomorfolóxico", chegando a ser a única especie capaz de facer desaparecer prácticamente todo vestixio de vida no planeta ...)
©Caridade Sanz
- - - -- - - - - - - - - - -- oooooooo - - - - - -- - - - - - - -
(Sen mais)
Sermos coma ti:
o dentiño da engrenaxe
que o destino quixo que foramos
sen batallas, sen trunfos, sen derrotas
Estar no mundo coma ti:
universo nacente, presente, solpor
no ciclo que o azar quixo regalármonos
sen vaidade, sen anhelos sen preguntas
Espertar cada día
cos ollos limpos da ignorancia
peitear as nosas plumas, xuntar os nosos picos
acubillar as nosas crías
Amencer
saudar
ó sol cos nosos chíos
choutar, petiscar, ir e vir
sen recordos, sen adeuses
(sen
máis)
morrer
quedar
na beira do camiño
©Caridade Sanz
Nenhum comentário:
Não é permitido fazer novos comentários.